Koan-î chok-chiá | 關於作者

Koan-î chok-chiá

Alexandre Dumas fils /aleksandro dyma fis/ (1824-1895) sī 19 sè-kí ê Franse chok-ka, i siá sió-soat kap kio̍k-pún. I siōng chhut-miâ ê sió-soat sī Tê-hoe-lú (La Dame aux Camélias), chhut-pán tī 1848 nî, sûi-āu, i koh kā sió-soat kái-siá chò ōe-kio̍k, tī 1852 nî siú-ián, mā hui-siông sêng-kong. Chit ê kio̍k-pún āu-lâi iû Italia im-ga̍k-ka Giuseppe Verdi kái-pian chò koa-kio̍k La Traviata (Tūi-lo̍h ê Cha-bó͘), 1853 nî tī Venice siú-ián.

Dumas fils sī chi̍t ê Paris lú châi-hông Marie-Laure-Catherine Labay ê su-seng-chú, in lāu-pē kap i kāng-miâ (Alexandre Dumas pére), sī chi̍t ê hong-liû ê kio̍k-pún chok-ka. Chit ê su-seng-chú it-ti̍t kàu 7 hòe chiah hō͘ in lāu-pē niá-ióng, m̄-koh in lāu-pē iáu sī bô chiap-la̍p in lāu-bú chò khan-chhiú. Tī kià-tha̍k ha̍k-hāu ê sî, i tiāⁿ-tiāⁿ in-ūi ka-tī sī su-seng-chú ê sin-hūn, hō͘ tông-chhong thí-chhiò. I chú-tiuⁿ, hong-liû ê cha-po͘ m̄-nā ài niá-ióng su-seng-chú, mā tio̍h chhōa su-seng-chú ê lāu-bú lâi chò khan-chhiú.

Chū án-ne, Dumas tī gín-á sî-tāi khòaⁿ tio̍h lāu-bú só͘ cho-siū ê kan-khó͘, hō͘ i tông-chêng khó͘-lān ê cha-bó͘, āu-lâi ê chok-phín chin chē lóng iōng in chò chú-kak. I ê chok-phín hong-keh sī iōng chin-chhiat, chū-jiân ê pit-tiāu biô-siá hiān-si̍t ê sió sè-kài; I jīn-ûi, bûn-ha̍k tio̍h ài kiông-tiāu i ê tō-tek lí-liām.

Dumas tī siàu-liân sî, bat tú-tio̍h chi̍t ê Paris ê ko-kip kau-chè-hoe Marie Duplessis, hō͘ i it-kiàn-chiong-chêng, nn̄g lâng chū án-ne tūi-lo̍h ài-hô, keng-kòe chi̍t tōaⁿ heng-hok khoài-lo̍k ê tông-ki seng-oa̍h. Āu-lâi, in-ūi chióng-chióng goân-in, nn̄g lâng koh hun-khui, Dumas tòe in lāu-pē chhut-kok lí-hêng. Duplessis Sió-chiá hoān-ū hì-pēⁿ, nn̄g lâng hun-chhiú liáu-āu pēⁿ-chêng koh lú giâm-tiōng, soah lâi sí-khì, hit-sî 23 hòe. Dumas tńg-lâi Paris ê sî, í-keng bē-hù koh kìⁿ i chi̍t-bīn, siū-tio̍h chin tōa ê táⁿ-kek, pēng-chhiáⁿ ti̍t-ti̍t chhàm-hóe. Chit tōaⁿ ài-chêng seng-oa̍h ê keng-giām kap chhiong-kek tō sī Dumas siá-chok Tê-hoe-lú sio-soat ê lêng-kám lâi-goân.

1875 nî Dumas fils tit-tio̍h ji̍p-soán Franse Ha̍k-īⁿ (Académie française) ê êng-ū, koh tī 1894 nî tit-tio̍h Franse Êng-ū Kun-thoân Hun-chiong (Légion d'honneur).

1895 nî Dumas sí ê sî 71 hòe, sí-liáu tâi tī Paris ê Montmartre Bōng-hn̂g, kap i chāi-seⁿ chêng-hū Marie Duplessis ê bōng sio-lī kan-ta 100 kong-chhioh.

Chu-liāu lâi-goân: Wikipedia

--

關於作者

Alexandre Dumas fils /aleksandro dyma fis/ (1824-1895) 是 19 世紀 ê Franse 作家, 伊寫小說 kap 劇本. 伊上出名 ê 小說是茶花女 (La Dame aux Camélias), 出版 tī 1848 年, 隨後, 伊 koh kā 小說改寫做話劇, tī 1852 年首演, mā 非常成功. 這个劇本後來由 Italia 音樂家 Giuseppe Verdi 改編做歌劇 La Traviata (墮落 ê 查某), 1853 年 tī Venice 首演.

Dumas fils 是一个 Paris 女裁縫 Marie-Laure-Catherine Labay ê 私生子, in 老爸 kap 伊仝名 (Alexandre Dumas pére), 是一个風流 ê 劇本作家. 這个私生子一直到 7 歲才予 in 老爸領養, 毋過 in 老爸猶是無接納 in 老母做牽手. Tī 寄讀學校 ê 時, 伊定定因為家己是私生子 ê 身份, 予同窗恥笑. 伊主張, 風流 ê 查埔毋但愛領養私生子, mā 著娶私生子 ê 老母來做牽手.

自 án-ne, Dumas tī 囡仔時代看著老母所遭受 ê 艱苦, 予伊同情苦難 ê 查某, 後來 ê 作品真濟攏用 in 做主角. 伊 ê 作品風格是用真切, 自然 ê 筆調描寫現實 ê 小世界; 伊認為, 文學著愛強調伊 ê 道德理念.

Dumas tī 少年時, bat 拄著一个 Paris ê 高級交際花 Marie Duplessis, 予伊一見鍾情, 兩人自 án-ne 墜落愛河, 經過一段幸福快樂 ê 同居生活. 後來, 因為種種原因, 兩人 koh 分開, Dumas 綴 in 老爸出國旅行. Duplessis 小姐患有肺病, 兩人分手了後病情 koh 愈嚴重, 煞來死去, 彼時 23 歲. Dumas 轉來 Paris ê 時, 已經袂赴 koh 見伊一面, 受著真大 ê 打擊, 並且直直懺悔. 這段愛情生活 ê 經驗 kap 衝擊 tō 是 Dumas 寫作茶花女小說 ê 靈感來源.

1875 年 Dumas fils 得著入選 Franse 學院 (Académie française) ê 榮譽, koh tī 1894 年得著 Franse 榮譽軍團勳章 (Légion d'honneur).

1895 年 Dumas fils 死 ê 時 71 歲, 死了埋 tī Paris ê Montmartre 墓園, kap 伊在生情婦 Marie Duplessis ê 墓相離干焦 100 公尺.

資料來源: Wikipedia

--